Haul Abu Usman Peulanteu, Mualem Siap Bantu Bangun Seumijib

Table of Contents

Meulaboh | Gubernur Aceh Muzakir Manaf atawa Mualem troh geujak bak acara Haul keu-4 Ulama kharismatik Aceh Abu H. Muhammad Usman Nurul Fauzi atawa Abu Usman Pedeung, di komplek Dayah Darul Aman Mesjid 1000 Tiang, Gampong Peulanteu, Kecamatan Bubon, Aceh Barat, Hameh, 17 April 2025.

Mualem geusambot le Abu Raja, Pimpinan Dayah Darul Aman, aneuk dari Abu Usman. Disinan gubernur saban-saban meuseulawet, rateb dan meudoa keu Abu.

Di keu ureung rame, Mualem geupeugah nyang bahwa Abu Usman nakeuh sidroe ulama nyang rayek that peungaroh bagi masyarakat dalam geubimbing umat. Bahkan geupeuteugah nyang bahwa lam masa Aceh diyup pemerintahan Mualem, akan geupeutroh cita-cita Abu, nyakni geupeulheuh pembangunan seumijib 1.000 tameh dalam komplek Dayah Darul Aman. 

"InsyaAllah cita-cita droeneuh nyan akan tanyoe peutroh, mungken lam anggaran perubahan atawa eunteuk bak thon 2026 akan ta alokasikan bah pembangunan seumijib 1.000 tiang nyoe terwujud," kheun Mualem. 

Seulaen melalui anggaran pemerintah, Mualem pih geupakat para pengusaha nyang na lam nanggroe dan di luwa Aceh untuk ikot bantu seumijib nyan. 

Leubeh nibak nyan mantan Panglima GAM nyan pih geupeuduek harapan melalui Dayah Darul Aman akan lahe ulama-ulama nyang peukong akidah dan syariat Islam di Aceh. 

"Dayah nyoe beu udep sabe, bah jeut na kader nyang got dan hayeu di bumoe Aceh nyoe di masa depan," kheun Mualem. 

Sementara nyan, Pimpinan Dayah Darul Aman Abu Ahmad Fauzi atawa Abu Raja, meulake terimakasih ateuh kehadiran gubernur Aceh bak acara Haul. Geupeugah nyang bahwa deungon trok gubernur,seulaen saban-saban untuk meudo'a, juga jeut keu silaturahmi ngon masyarakat di sinan. 

"Nyoe bagian dari silaturahmi sit, soe nyang meuh'eut beupanyang umu dan mudah raseuki, maka beu le silaturahmi," kheun Abu Raja. 

Abu Raja pih geupeuingat mandum pihak untuk jaga kerukunan, bek sampe karu dan bicah meubicah seu-sabe droe, "Tanyoe nyoe beu rukon, lagee sabih ma saboh yah, deungon cara lagee nyan keuh jeut maju Aceh ukeu," haba Abu. 

Seulaen daripada Mualem, na sit hadir untuk peungon gubernur bak acara di Dayah Darul Aman, Kepala Dinas Syariat Islam Aceh Zahrol Fajri dan Kepala Biro Administrasi Pimpinan Setda Aceh Akkar Arafat. Lam kawan na sit aneuk Abu Usman nyang laen, yaitu Abu Won dan Abu Man.[]